سه‌مای گوڵ
گوڵی سۆز له دڵما هه‌ڵوه‌ری
چه‌می زام بۆكانی ناخه‌وه‌م سه‌ریكرد
ته‌نهاییش له بوونم وه‌ڕس بوو
بۆ خۆزگه‌ی ئاواره
له‌گه‌ڵ ئه‌شكه‌نجه‌ی ناله‌بارا
بۆ كه‌ساسیم سه‌ری هه‌ڵگرت
شه‌ونه‌مرد.. ته‌رازووی بیرو هۆش لاسه‌نگ بوو
له نیازی خه‌واڵووم دابڕام
چاوه‌ڕوانی خه‌نده‌ی هاوده‌نگ بووم
تۆ نه‌بووی سكاڵام به سه‌مای گوڵ ببه‌خشی
برینه‌كانم بكه‌یته به‌ری خۆر
شه‌و نه‌ما له كاسه‌ی زامێكا
ئه‌شكی روون نه‌نۆشم
شه‌و گه‌رووی مانگی به تاریكی تاساند
گه‌ڵایه‌كی زه‌رده خه‌زانێك نه‌بوو
دیده‌كانمی پێداپۆشم
له ده‌نگی گڤه‌باو.. له‌ویزه‌ی باریژه
مه‌رگی خۆم به‌كاڵای ئه‌هریمه‌ن ده‌بڕی
تاراجم به روانكه‌ی نشیوی چیابوو
ئه‌گه‌رێك ته‌مه‌نمی له تاپۆی ژیانا نووسیبێ
دڵێكی زامداره سۆزی دادوه‌ری حه‌لاجی تیابوو
له گڕا ده‌سووتێم له ئه‌شكا به‌ڕۆژووم
شه‌و په‌رچه‌می مانگی داپۆشی
به ته‌نهایی.. به سزاوه چاوه‌ڕوانم
وه‌كوو ساتی رۆژانی زووم
كه نالی خاك‌و خۆڵی به‌جێهێڵا
كاتێك خانی ده‌می خاك ته‌رمه‌كه‌ی ماچ ده‌كرد
دێوانه له ژێر سایه‌ی دارێكا ردێنی به‌ردایه‌وه
مانگ تاساو خۆر له‌گه‌واڵه‌دا خنكا
شه‌و.. وه‌كو كیژێكی هه‌رزه‌كار
پرچی زیاتر هه‌ڵدایه‌وه
به‌ڵام گه‌واڵه‌یه‌ك بووه ردێنی سپی مه‌حوی
بارانێكی به هێدی كه‌وته ماچكردنی زه‌وی
ستار ئه‌حمه‌د
