هاواری گڕ

ستار ئه‌حمه‌د

ناڵه‌ ..مه‌گه‌ر خاك لێی بگا
سووتان .. دره‌خت چاك ده‌یناسێ
خنكان.. په‌ت ئازاریت بۆ باس ده‌كا
مناڵ … دوا خه‌ونی دایكه‌ و
شیعر … شاعیر بۆی ده‌گه‌ڕێ
نیسانیش دێ “ته‌نها كورده‌
سنگ و به‌رۆكی داده‌ڕێ
په‌پووله‌ .. داڵاش تێر ناكا
زه‌مین .. زیندووی بۆ هه‌رس ناكرێ
كه‌ی ره‌وایه‌ … جه‌سته‌ی مناڵ
به‌قه‌ل و ده‌ڵه‌ سه‌گ بدرێ
ده‌مێكه‌ ماڵ
له‌خاوه‌ن ماڵی بێبه‌شه‌
فرمێسك .. دیده‌ ده‌خنكێنێ
چاوه‌ڕوانی .. دڵ ده‌مرێنێ
گوێ .. سه‌دایه‌ك رووی تێناكا
ماف.. له‌سێداره‌ی داد ده‌درێ
هه‌ر تاوانه‌و
به‌ناوی خوداوه‌ ده‌كرێ
یاسا ..له‌زاری كه‌س ناگا
خه‌سڵه‌ت.. له‌مرۆڤ ته‌ریوه‌
زه‌مه‌نێكه‌ زیندوو خۆرین
ویژدان له‌ناخمان گه‌نیوه‌
ئه‌نفال..به‌نووسین نانووسرێ
قه‌ڵه‌م ..ناتوانێت گوڵ كوشتن
له‌په‌ڕه‌دا شیكاته‌وه‌
جه‌رگی هه‌وارم سووتاوه‌
كێ وه‌ڵامی بڵێسه‌و گڕ ده‌داته‌وه