حسن هادي الشمري
آه يا روحـــــي
إشكثر بيچ
جروح توجع
وإنت إطباعچ صبر
تبچين سكتـّـــــــــــه
آه يا روحـــــي
معارك ويّ الضيم
كَضيت العمر
يا البيچ ألآوي الموت
وإنتِ البيّه ميتــّــــه
آه يا روحــــي
الحزن بيدّه يعتنّي كَوه
وانا بچفوف المنايا
بخوف أعتّــــــــــه
آه يا روحـــــي
الصبر طشرنّي سوالف
وأنا وكتي
من الفرح مبيوگ
والبايكَنّي وكتـّــــــه
يا زماني
المّا يعَّرف المستحى
ويّ الباع للعدوان بختّه
ويا عُمر ضاع
أعلى درب المامّش
وما چنّي عشتــّـــــه
ويا نهاري
التيّه دروب الشمس
غصبّن عليّه
وما دريت يردلّي يمته
چنت أظنّه الماي
ثاريه السراب إلي عطشته
وانا غيمــــــه
نامت بحضن السما
ضمّت بچيها لجيّة إشته *
آه يا روحـــــي
الصار ما مرّ أعلى غيري
الآنا شفتّــــــــــــــــــه
الــــوكّت …
ماخذني بدروب الغريبه
أعمى مشاني أعلى سكته
حيل يا غَمّ الزلّم
چا شنهي نفعه المّا فزع
يصهل رصاص
بليل لو هلهلت إختـــه
آه يا فشلة إعكَاله …
يطيح من المستحى
أعلى الكَاع
من إچتافه بشتّــــــه *
والشمس حزنانه تبچي
أعلى الصبح مبيوگ
ومضيع غبشتّـــــــــه
آه يروحـــــــــي
كون تجمّح خيلنا
چا طرنا للعنان السما
وچا بيدي نشتـّـــــــــــه *
وچا جِبّت منها النجوم
بحضنّي فرحان
وعلى دروب الوطن
بيهن فرشتــــــــــــه
* إشته / الشتاء
* بشتّه / عباءتة الرجالية الصيفية
* نشتّه / مسكته بيدي
