ستار ئه‌حمه‌د
وه‌رزی وه‌رین و
پژانه
ساڵی كۆچ و دابڕانه
كوا سه‌روه‌رانی خاكەكەم
بۆچی خه‌مێك له‌ئازارو
دوارۆژی ئه‌م گه‌له ناخۆن
ماڵوێرانی و
سه‌رگه‌ردانی هه‌تاكو كه‌ی
راستە ئه‌گه‌ر ناچار نەبیت
ده‌ست بۆ نانی ناكه‌س نابه‌ی
بووینه قه‌ره‌جی وڵاتان
هه‌موومان گۆڕ غه‌ریب كراین
به‌ناچاری و له‌برسانا
له‌زيَدی خۆمان ده‌ركراین
حوكمه‌تێك پیس خۆر بێت
حوكمه‌تێك بێ په‌رله‌مان
حوكمه‌تێك خۆی ملیاردێر بێت
گه‌له‌كه‌شی بمرێت بۆنان
وابیست ساڵه چی كراوه
هه‌ر به‌ڵێنی كرچو كاڵه
به‌گوێی من و تۆ دراوه
هه‌موو كاریان نمایشه
كه‌ناڵیان قسه‌و درۆیه
تۆ دیوته بانكی ده‌وڵه‌تێك
یه‌ك دیناری تێدا نه‌بێ
هه‌موو شتێكیان قۆرخ كرد
به‌هاو بوون و ئینسانیه‌ت
له‌گۆڕ نران
ئافه‌رین بۆ حوكمرانێك
داعش و ده‌ردو مه‌ینه‌تی
بڕی به باڵای نیشتمان
ئێستا ئێمه
له‌ژێر باڵی برسێتیا
بێ كاره‌باو
ئاوو مووچه
به‌خه‌می ماڵا راناگه‌ین
كێشه‌ی خاك و
پارچه‌بوونی
دڵ و جه‌سته‌شمان
سه‌رباره
كه له حوكمه‌تیش ده‌پرسی
ده‌ڵێت میلله‌ت به‌ر پرسیاره
سەری ساڵە
دڵم دەڵێت
بمكە ئاڵا
مێشكم خاكێك داگیرساوە
جەرگم خوناو هەڵدەڕێژێ
بۆ ژانی چیاو
ئەو لوتكانەی
كوردستانیان لەكۆڵ ناوە
سەراپای جیهان بگەڕێی
ئاهەنگی شادی دەگێڕن
گەلەكەی من
چاوەڕوانی
مشتێك برنجی ئابوونەو
مووچەی مانگانەو
جلوبەرگی
ئافرەت و ماڵ و مناڵە
شەوانمان لەجیاتی سەماو
گوڵبارین و
گۆرانی و شنەی پێكەنین
وێردی گیانەڵای مردنە
چاوەڕوانیی
هەواڵی هاتنی چەتەو
داگیركەرانی دوژمنە
هەموو پارچەكانی لەشم
لەنێو بەفرو
تەقەی گوللەو
زرمەی تۆپا
رۆژەكانی مانگ دەژمێرن
ساتەكانمان لەیەك دەچن
چوون تارمایی دیدەی كوێرن
ئاسمانی تەممان بروسكەو
چەتری سەرمان گەواڵەیە
تینی هیوامان زریوەی
توێشووی سەرشانی پێشمەرگەو
هەواڵنامەی ئەم ساڵەیە
