حامد كعيد الجبوري
- إعلان -
مهداة إلى شهداء الوطن من الحشد الشعبي والقوات المسلحة الذين سقطوا ليلة ١-٢/ 2020 دفاعا عن العراق وشعبه المظلوم …
عارٌ عالسياسة وعالسياسين
زرعكم صوفر وحدوا مناجلكم
ما برء احد منكم وحق الكون
هجمتوا بيوتنه وتزهي منازلكم
ركضتوا عالكراسي بمالنه المسروق
تقاسمتوا الغنيمة ونلتوا حصتكم
(سنتكم) دواعش (كرد) تشعل نار
و(شيعتكم) غدر ما تعرك كصصكم
ما بين الذبح والبوك والنيران
مظلوم الشعب يعرف مهازلكم
انتظرناكم عمر يتعمر المهدوم
زيدتوا الخراب وما يصح منكم
خليتوا الشعب يترحم الهدام
وأقسم ما يحبه ولا يجاملكم
بيزيد الطاغية الحجاج لو فرعون
أقيس بيا رذيل وبيش اقارنكم
سمعتوها المنابر تصدح الأصوات
ويلعن بالشتيمة أمريكا ويذمكم
بساحات التظاهر ساحة التحرير
وصوت المرجعية بسوء تذكركم
ما بيكم أصيل وينتصف للناس
أجيتونا بخراب وسودة نيتكم
***
يومية العزه يوميه جم عريس
منصوبه الچوادر من فعايلكم
شبان الوطن طلكوها للذات
وبحزام الفتاوى أيصد دواعشكم
جرح سبايكر بعده الجرح ما طاب
وضحايا نينوى وتيجان امارتكم
معلوم التواطئ صار أمر مكشوف
بكل خطوة خيانه الله فاضحكم
***
يا حشد الشعب يا جيش يا قوات
ثارات الشهادة ابشرف شاربكم
الزلم ما تنكسر وانتوا يرفعة راس
اليتامه والأرامل تنخه رايتكم
كفو ونعمين منكم يا سواد العين
َمعكود النصر تشهد مواقفكم
رايات الوطن ما تنكس والله
بهلاهل للنصر نسمع بنادقكم
