وفاء عبد الرزاق
- إعلان -
لا ما رحِتْ.
ﮔلبي الراح ﮔبلي وناح
من شافك طحِتْ
وﮔبل ما اتنوح الفخاتي
على النَّخل
جَسني شوﮔك حيل
كلِّش حيل من ذﭼرك نحِتْ.
رحِتْ؟
لا ما رحِتْ
بَس اﮔضيت
وايَّامي ﮔضن
مثل خرزات السبَح
خرز خرزة
ابَّين صابيع السنين
اتطشَّرِتْ.
رحِتْ؟
لا ما رحِتْ
لاﭼنَّه العمر طشَّار
وأيَّامي جهال
تلعب بالتناثر
لعبة روح
لعبة ولي..
وماكو لعبة ابَّينهن تطلع تعال
يسبحان الصلاة وحمد لله
تدري بيك تـﮝبَّلت
جبلة الباري وسبَّحِتْ.؟
ورحِتْ ؟.
.. لا ما رحِتْ
وما اريد اﮔلك ليش ما انت تجي
إنت هنا معشّش خان
شلون بالخان ارتجي
يل تيزاب ضمَّادك
ظليت اعاتب بالصبر
تـﭽيتكم كلكم عليَّ او ورَّدِتْ.
يسألك تنور أمي المابرد
هذا أوَّل جرح
لو آخر جرح؟
يل بيَّ اختلتْ
مثل جاهل
يلعب الغمَّيضة بذيال البشِتْ
رحِتْ؟
لا مارحِتْ
بعيوني أريدك
موش حلم ونوم
ولا خوفة الجايع
من يخون الزاد
أْهابك موش اخافك
وموش ذلِّة
وموش
وموش.. وانذلَّيتْ
وناخ انتظاري ومانخِتْ.
رحِتْ؟
لا مارحِتْ
ياسورة تبارك
يا جزو عمَّة
الحلم..
صم ملح بالعين
وصم كِزازة
وصم جفِتْ
بلكت تِكف عنِّي
ولَوْ فد يوم
وبلكت وبلكتات
وبلكتين
وغير الموادَع ما شِفِتْ
تابن كلهن المدلوعات بيَّ وماتبِتْ
يل عينك أنصاف ومروَّة
ومرحبة ليِل
لعناد الصبح
يَ الكلِّش وكِحْ
يَبو وجه السمِحْ
وملح للماله زاد ولا ملِحْ
يا ضحكة هلا بفانوس للخطَّار
يل فرَّة مْضيف ودﮒ صدر
يا عُوذة مسودَن
يبو حـﭼي الذربْ
يل خابط المايين
يل مُرّْ وعذبْ
يا…. يل كلشي ارد اﮔلَّك
يا ذهب خالص
يا نهر زعلان
يا روجة ﭼذِبْ
جيت انشد الراي الغربتي
وعلى يا دِين الضم سبحتي
وعلى ياذنِبْ
ويا ركعة تقبل تيَهِتي
و على يا قسمة فصَّلني الوكِتْ
وليش بس آنه التهتْ
رحت؟
لا ما رحت
ظليَّت اتمرغل على ترابك
كلِّش حلو ترابك
حتى لو جنَّاز بيَّه
رضيت
ويا حياة وموت
ويا… ويا شنُو؟
يا.. يا شنو؟
ويا عيبي بسؤالي تلعثمِتْ
دﮔيت بس الحزن ردلي
ولـﮝيت عند الباب جنَّاز الوكِتْ
مدري يا هو المات إنتَ
لو آنه المتتْ
ولـﮝيت احبال بيتك راخية وترجى السَمِتْ.
