دەرهاویشتەکانی نامۆیی

دەرهاویشتەکانی نامۆیی
…………………….
شــــــیعر/سەلوا ئیسماعیل
وەرگێڕان/لوقمان مەنسوور
————————–
لێم ئەپرسێت
چی لە وڵاتی نامۆیی ئەبینم ؟!
شارانێ بە ترس و دەمامکەوە ئەبینم
شەقامی زامدار لە تەنیاییدا ئەنووزێتەوە
شۆستە خۆی ئەداتە سەر شانی ڕێگا و
سەری گفتوگۆ ڕائەکێشن
بەرزبوونەوەی نرخەکان و
پسووڵەی کەڵەکەبوو لەسەر ڕەفی دڵ
لێرە دەریا بێ کەنارە
کەشتی بێ چارۆکەیە
نەوڕەسەکان بە بێ باڵ بەرز ئەفڕن
کە ئاشقێکی تەنیا ئەبینن
ئەبن بە باڵێك هێندەی چەتر
سێبەری پێ ئەبەخشن !
لێرە تووڕەیی و ئارامی هەیە و
تەنها کەنارێك ئەڕوانێتە هەیوانی شێتی
چاوان دەست لە ملی نەخشەی جیهان ئەکەن
بە ژیری وێنەی دەریا و کەشتی بۆ گەشتیاران ئەکێشن !
لێرە نامەکان بە بەرامەی پەرۆشین
چاوەڕێن باڵیان لێ بڕوێ و بفڕن
دوای ئەوەی لە با بێ ئومێد بوون !
لێرە پێکەنین دەست لە ملی هەناسەی مەرگ ئەکا
ژن ملی بەسەر ئامێری دورمانەوە شۆڕ بۆتەوە
پەنجەی پێشبڕکێ لەگەڵ دەرزی ئەکا
تا ئەچەقێتە گۆشتەکەی و
بە کوتاڵەکەوە ئەنووسێ
خوێنی ئەچۆڕێ و ئەبێ بە نان
بۆ ئەو دەمە کراوانەی چاوەڕێی خواردنی ئەکەن
لێرە ژن و پیاو و زمانی جۆراوجۆر هەیە
دوای ئەوەی دەمامك و شاوری پۆلیس زمانی بەستن
بە چاو ئەدوێن
لێرە من و تۆ
نامەی ناو شووشەیەکن
فڕێدراوەتە ناو دەریای بیرچوونەوە
شەپۆلەکانی نامۆیی تێمان ئەگرێ بۆ قەد سەنگەکانی کەنار
هەتا پارچە پارچە بین
ئەرێ پارچەکانی دڵ
پێی ڕێبواران ئەبڕن ؟!
————————–