دەبا بڵێم
ــــــــــــــــــــــــــــــــــــــــــ ل.لەك
دەبا بڵێم
خەیاڵەکانم ڕاستیە
تۆ هاتیت و لەبەر دەرگام
بەشەرمەوە ڕاوەستاویت
پەشیمانی
دڵیشت پڕ لە ئاوازی
ئەوین و خۆشەویستیە
دەبا بڵێم
تووڕە نەبووم کاتێك کە
دڵت شکاندم
بۆ ماچێکی لێوەکانت
لێم تووڕە بوویت
بەڵات بە سەردا باراندم
دەبا بڵێم
خۆشەویستیت لەبیر ئەچێ
جارێکی تر لە نێوانمان
بە هیچ جۆرێ ژوان نابێ
ئەم دڵەی کە تۆی خۆشئەویست
لە دووری تۆ ئارام ئەگرێ
دەبا بڵێم
ئیتر هەرگیز جێم ناهێڵی
هەر بۆ ئەوەی لام بمێنی
هەموو کەست بەجێ دێڵی
هەر بۆ یاری
تەختی سینەم
بە نووکی پەنجە ئەکێڵی
دەبا بڵێم
کەمن شێتم بڕوام بە عەشقی تۆ هەیە
بە ئاگا دێم ئەزانم تۆ
مایەی ئێشی بۆ ژیانم
نایەیتەوە و
ئەبیتە هۆی ئازار گریان
بڕك و ژانم
بەدمەستانە پێك ئەنۆشم
وا ئەزانم چارەی دەردم
شەراب ، مەیە
