حكايات أبي زاهد…
چماله اسمك جُمعَه!
چماله اسمك جُمعَه!
في الحديث «المؤمن مبتلى»، وفي العراق الجديد المتقاعد مبتلى، ولا تسألني متى وكيف؟ فمنذ التغيير حتى الآن نسمع بقانون التقاعد الموحد ولا ندري ما هو الموحد. «كراج النهضة الموحد» و»تحالف البيئة الموحد» و»الحزب الوطني الموحد»! وكل شيء أصبح موحدا دون أن نرى أثرا للوحدة عليه، وكل قانون يصدر أتعس من سابقه، وننتظر تعديله، وتعديل أسوأ من تعديل، حتى وصلت الأمور إلى أن فرضت الدولة جزية على المتقاعدين، استلبت فيها قسما من رواتبهم من باب المجهود الحربي ودعم النازحين، رغم أن القوانين الوضعية والسماوية تقول انه لا يجوز استقطاع أي مبلغ من رواتب المتقاعدين، لأنها نتيجة الاستقطاعات المفروضة على رواتبهم وتعتبر ادخارا لهم أي ملك طابو لا يجوز التلاعب به.. «تيهيه بهيه» استدرك سوادي، وقال: «هم ردينه على طلايب المتقاعدين ذوله صارو دعبل ويلعبون بيه طنب، وصاروا مثل ذاك: يكولون اكو واحد سـأل ابوه كله بويه شنو شغلك؟ كله بويه آنه أخوْي الوادم. كله اشلون؟ كله چنت الزم بيدي تُوثيه وأگف عالجسر واتحجج عالناس واصبح مَثلا الحافي آخُذ منه عانه واليسمَع كلام مَرته آخُذ منه عانه والاگرع .. واللي عندَه كرش , واللي شايل دجَاجه واللي اسمه جُمعَه .. آخُذ منهم عانه عانه وأجمع مصرفي. كام المحروس اخذ توثيه ووكف براس الجسر ولن واحد حافي كله ذب عانه كله ليش عمي؟ كله لأنه حافي، كاله والله ما عندي هو الحافي منيله عانه، دفعه وكع عالكاع سمع صوت دجاجه كاله وجماله شايل دجاجه صار عانتين وضربه راشدي وكع شماغه طلع أكرع، كله وجماله أكرع صار ثلث عانات فكاله الحافي عمي والله صوج مرتي كلتلي ودي الدجاجه البيت أختي، كاله وجماله تسمع كلام مرتك صارن أربع عانات، كاله منين أجيب ما عندي ولا فلس. شاله راد يذبه بالشط كله عيني على كيفك لا ينبط كرشي، كاله وجماله عندك كرش صارن خمس عانات، صاح الحافي أشتوه ابيّك يجمعه، منين أجيب خمس عانات كله وجماله اسمك جمعه صارن ست عانات!».
محمد علي محيي الدين
