تووڕە بە /١٤/٥/٢٠١٩
————————–
تووڕە بە و بە جێم بێڵە
جارێکی تر مەمبینەوە
تووڕە بە و
چزی داخت بخە سەر دڵ
زامی دەروون بکولێنەوە
تووڕە بە
تازە ئیتر من بێباکم
لە تووڕەییت
هیچ گوێ نادەم
بۆ جێم دێڵی و
بۆ کوێ دەچیت
تووڕە بە
خۆ من لەو دۆخە ڕاهاتووم
ساڵانێکە
بە دەست تووڕەبوونتەوە
کفت و مانووم
تووڕەبە
خۆ ئیتر من لە سۆزی تۆ
بێ بەشم
بە خوڕ دەڕژێ لە دوو دیدەم
نمی گەشم
تووڕە بە
تازە لە عەشقت بێ هیوام
ئیتر هەرگیز تیمار نابێت
دەردی دەروون
ساڕێژ نابێ
برین و زام
تووڕە بە
ئازیز تووڕە بە
ـــــــــــــــــــــــــــــــ ل.لەك