بروسكه‌ی ناسۆری
سه‌رت بووه به كوێستان‌و
دڵت گڕی ئه‌م گه‌رمیانه‌ی دانامركێ
له باوه‌شی له‌تێك خاكی نه‌بوونیا راوه‌ستاوی
په‌نجه‌كانت به ته‌پۆلكه‌ی زاما ده‌كه‌یت
چاو ده‌گێڕی بۆ قارچكێ
دڵت زه‌وییه‌كی ده‌یمه
له باوه‌شی كانیاوی ساردا نه‌بێ
خه‌و ناچێته چاوه‌كانی
وه‌ك نابینای گرده‌نشین
ده‌ستت له گه‌ردنی گه‌واڵه‌ی ره‌ش ئاڵۆزكاوه
له ژێر پرچی قه‌یره كچی ئه‌م تاسه‌یه
دڵت مۆرانه‌ی عه‌شقێكی تێدازاوه
شه‌وانه وه‌كو كه‌روێشكێكی كێوی چیا
به دوای ئه‌شكه‌وتێكا سه‌رگه‌ردانی
بێچووه‌كانت له ده‌رونیا ئارام بگرێ
به ده‌ست ئه‌م سۆزه شێته‌وه
هیچ دوور نییه
دڵت به دوا ترپه‌ی ماڵاوایی
بۆ یه‌كه‌مجار بسره‌وێت‌و یاخود بمرێ
له‌سه‌ر رایه‌خی گڕنشین
چاوه‌كانت به‌ره‌و ده‌رگا
چوار چێوه‌ی ژوورێكی خه‌مگین ده‌تروكێنی
له نێو هه‌ناسه‌ی مناڵی بێپۆشاكا
ده‌سته‌كانت به نێو بسكی میهرو سۆزا
به‌ره‌و كۆشكی دڵنه‌وایی ده‌بزوێنێ
خه‌ونت ده‌بێته داڵێك‌و
چۆله‌كه‌ی سه‌ر ئه‌م ره‌شماڵه ده‌تۆرێنێ
زریانی ئاره‌زووی كۆنت
دڵت به چه‌شنی كۆلاره‌ی
به‌رزه‌فڕی ساواكانی ئه‌م ناوچه‌یه ئه‌دڕێنێ
تاڵی تاسه‌ی بابرده‌ڵه‌ت
وه‌ك په‌رچه‌می كیژێكی باڵا كه‌ڵه‌گه‌ت
له ده‌ستی خه‌نجه‌ری رۆژگار
ده‌ئاڵێت‌و ناكرێته‌وه
تۆی ناسكیش
نه‌ك تاڵێك مووت بۆ ناپچڕێ
به‌ڵام ده‌زانی هه‌ناوی داگیرساوت دانامركێ
ناخی تینووت تێراو نابێ‌و
ده‌نگی بروسكه‌ی ناسۆریت نابڕێته‌وه
ستار ئه‌حمه‌د
