ئاوازی جوانی
تروسكه‌ی خۆری ئاسۆی ده‌مبه‌یان
په‌یامی عه‌شقی به‌لوتكه گه‌یان
ره‌زی ده‌م كه‌لی ئه‌وبه‌ری كانی
تریقایه‌وه بۆ خودای جوانی
باڵداری سه‌رچڵ به‌به‌زم و خۆشی
تارای پرشنگی ئاسمانی پۆشی
گوڵی كه‌ژو كێو به‌نیگای شیرین
به‌رامه‌ی سۆز بوون بۆ چاره‌ی برین
كه‌ژو كێو كه‌وتنه به‌سته‌ی گۆرانی
له‌گه‌ڵ تریفه‌ی ئاسۆی به‌یانی
له‌پڕ روومه‌تی گوڵ گه‌شایه‌وه
كاتێك دولبه‌رم هاته لایه‌وه
من و به‌یبوون و كۆنه هاوڕازم
بووینه ئاوازی خۆشترین به‌زم
تارای ئه‌وینمان به‌پرشنگ چنی
گزنگ بۆ پاكی عه‌شقمان پێكه‌نی
ستار ئه‌حمه‌د
