ألشاعر ألثائر مظفر النواب
جدارية في ألذاكرة ألعراقية
حسن حاتم المذكور
ــــــــــــــــــــــــــــ
خلگ البنفسج موش اله
ما مر قطار الليل
زعلان وي كهوة هله
ما بيهه ريحة هيل
يا حمد دگ كهوه
بلكت يحن الهوى
ويجيب جيته ألريل
………………
حلت زلفهه ولفته
جوريه معگوده خصر
مر بيهه صيف ومر شته
فضض گصايبهه الشكر
يا حمد غفوة سهر
بسكوت مر العمر
وتعده بينه ألريل
………………….
يا ثلج ردتك طيف
تمر وتشتعل بيه
مثل ماي على ريج الصيف
اضوگك عطش حنيه
شربنه من السراب اوهام
حمد طفي النجوم ونام
بعد ما ظن يمر الريل
……………..
يبچن شموع العرس
ما جن سوالفنه
فيّ المضايف شمس
بعيون لمتنه
يا حمد غاب الگمر
والعشگ صاح ابقهر
صيحة وصايه الريل
…………………..
نرضه يميزان الذهب
بالعشگ لو غشيت
هز السنابل عتب
فز الكطه وفزيت
يا حمد ما ضل فرح
ملجوم بينه الجرح
علسده ما جه الريل
ــــــــــــــــــــــــــــ
بچه ليل المحطه دموع
دكن بابنه وردن
مثل خيط السمج مگطوع
خرزات العمر مرن
وصلن عتبة الشاهود
ــــــــــــ يتعثرن
لو نشدن حمد گلهن
نسه جيته ونسانه ألريل
20 / 05 / 2022
