وفاء عبد الرزاق
شِنْهو تريد؟
واتْظِن أطخلكْ الراسْ؟
أنا الباشَگ ترى
موش ظِلّْ غرابْ
لا عالَتْ عِتبتي
ولا چذَبْ لي باب
كِلّْ الروس تِنْخى
مِن تِصل حَدّي
أنا ابن الناصريَّة
اليروى مِنَّه الصَّيف
وانا ابن الشته
الدفَّيت كِل بَردي
أنا جروحي غترتي
وسَكتِتي صَبرين
انا الحطَّبت الدمِع
وتوزَّرت بِعْناد
وشدَّيته بغترتي
ولا وصل خدَّي
ما نامت ادْلالي
ولا غُمَضْ فِنجان
ولا صام بمضيف
اسْماط عِدّ جَدّي
ولَكْ يَصغير
رِدْ لا تِلاوي اصْگورْ
أنا جِدْحْ السَلَفْ
والماي والبَردي
يا روجة زِنا
يَلْ فايض بْعَارَين
تريد تْگيس طولك
وَيْ إبنْ ضرغام
ولك يَگصير گلّي
اشجابك لگدّي
مِنْ اجْبيني الخُبِزْ
وابئدي چَفْ محراثْ
وانا التنُور يشبع
مِن عرَگْ كدّي
زارتا الشَّمِس
خاف نريد حفنة نور
زلمنا شموس ،،
گِلنا ارجوچْ لا ردّي
احانا الما بطَلْ
فانوسنا بنِصْ ليل
احنا تكحلَّت نسوانَّه
مِن الوَيلْ
ويا مَدّْ الوطن ريَّان مِنْ مَدّي
أبنّا الهابه كِتر الموت
لمَّن خَضرَتْ اكتاره
وغدى شارة
گحَم عاشور نصّ الليل
نِزعْ عنَّه الَّليالي
ولبَّسه الوردي
اهُو مراد النذور
وفرحتي سَعدي
يا ابن اوَّلْ أمِسْ
مو گدْ لِعِبْ ويَّايْ
ترى التاريخ شَدْ اچتافه مِنْ شَدّي
شَرَفْ “لاله” بمشيتي
وظِلّي ظِلْ فانوس
وضوَّكتْ المِحَن برحي
بجفن عيناي
وشَتلات العَطَش
ناعورهن چَبدي
عَدَّيتْ بصفاتي وما خلص عدَّي
ما يْفدكْ حَرِگْ بخيام لو چتَّالْ
مِنْ صدر الشَّهامة الگنطرة المِهوالْ،،
ها وها وياهو اليِگحَمْ
بنْ ذي قار ويوَصَل لَيه
يا هو اليگم بنْ ذي قار
ويوَصَلْ لَيه.
