الحرب العالمية الثالثة

latifa_aldlimy

أحمد سعداوي

ما مقتنع بسالفة “الحرب العالمية الثالثة”، اصلاً صارت كومة حروب من الخمسينيات لليوم تشبه الحرب العالمية الثالثة.
حرب الخليج الثانية “عاصفة الصحراء” همين بعض المعلقين والكتّاب الغربيين سموها “حرب عالمية ثالثة”، وصاروا يؤرخون بيها، ويعتبرونها لحظة فاصلة في تغير هواي أشياء. وأهمها: الاعلان الاستعراضي للقوة لإنفراد أميركا بالعالم.. وصارت هي الكليط الجبير.
ضرب برجي التجارة العالمية ب2001 نفس الشي. انتقال الحروب الى قلب العالم الاسلامي. وأصلاً احنه لحد هسه في عالم ما بعد 11 سبتمبر، وكل الصراعات اللي جاي تصير هي بمزاج هاي اللحظة الفاصلة.
.
ترامب بكلمته المتلفزة الأخيرة هواي مدح إيران، حضارة وشعب عريق ومن هاي السوالف [يا حيف علينا إحنه اللي ما محد معبرنه!]، وبكل مناسبة سابقة كان يمدح إيران، وكرّر أنه لا يريد تغيير النظام الايراني.
اللي اشوفه ان ترامب، ومن خلفه النظام الاميركي كلّه، يريد العودة الى تقاسمات حكومة العبادي، وأن أكل الساحة كلّها من قبل ايران كما في الوضع الحالي مرفوض [يا حيف علينا محد معبرنه لو ملخينه إحساب!].
.
نفس الشي على الجهة الثانية؛ ايران تفهم تماماً أن أي ارتفاع لسعر صرف الدولار في العراق يعني صعوبات اضافية على الاقتصاد الايراني، اللي معتمد بشكل أساسي على الاقتصاد العراقي، وتوريد العملة الصعبة وكونه منفذ لتصريف البضائع وما الى ذلك.
وإيران أكثر ذكاءً من ربعنا، بازارات وثعالب سياسة حاطين راسهم براس اميركا بالملف النووي صارلهم سنوات. ما معقولة يحصرون أنفسهم حصرة “عراق التسعينيات”! وهي حصرة ستؤدي بنهاية المطاف الى سقوط النظام الايراني.
.
الحرب العالمية الثالثة المفترضة لن تكون طبعاً بين ايران واميركا وساحتها العراق، لأن هذا هو واقع الحال من 2003 الى اليوم وماكو شي جديد.
الحرب العالمية اذا صارت فراح تتعلق بالتنين الصيني ومحاولة قطع مصادر الطاقة عليه، وهاي الاخيرة كلّها يمنه بمنطقة الخليج والعراق وايران. ولكن، من هو الأحمق الذي يريد لها أن تبدأ فعلاً!

نبذة عن الكاتب

مقالات ذات صله

الرد

لن يتم نشر عنوان بريدك الإلكتروني. الحقول الإلزامية مشار إليها بـ *