مـــــــــــــــــا أريــــــــــــــــدك

حسن هادي الشمري
مـــــــــــــــــا أريــــــــــــــــدك
كافي ………….. كافي
يا الوفيت وياك حسبالي توافي
يا اللـﭽـمت جروح ﮔـلبي وعطشتهن
وﭽـنت أظنك نبع صافي
يا البرد طبعك وأنومه بحضن روحي
يا ثلج وتنام وسط الـﮕـلب دافي
يا السهرت الليل لأجلك
وأنت وي الليل غافي
ﭽـنت ألولي أعليك مثل أمك
وأﮔـلك نام يا نوم العوافي
يا الوصفتك لليسألوني
عطر قداح … لو ﮔـطرة ندى
لمن أبوسك على شفافي
تالي من شافوك شوك وحنظل
تمرمر بروحي … شرد أﮔـلهم
آه يا فشلة الفشله
وآه يا ﭽـذبة أوصافي
يا الشعلت الروح ألك شمعه تضوي
تالي من ذابت شمعتي
الـﮕـيت ما عندك حنان
وﮔـلب ما بيه ضوه وطافي
ما دريتك تحب غيري
وتمشي عني بعيد وتصد وتجافي
كافي ………….. كافي
كافي روح بعيد ما أريدك تجيني
يا الحرﮔـت اسنين عمري شموع لأجلك
أشلون ارجعهن اسنيني
ويا الزرعتك ورده أسـﮕـيها
ودموع العين غيمه
وﭽـنت أطشرهن مطر يا دموع عيني
ما دريتك ملح بس تلـﭽـم جروحي
وما دريتك وجع وتزيد ونيني
حيل كل الصار مني …..
انا بعت إلي إشتراني
وأشتريت البايعيني
كافي ……….. كافي
كافي ما ظلت سنين وياك أذوبهن
شموع
كافي مو يبسّن عيوني ….
لو بـﭽـن غصبن عليَّ …
أمنين أجيب الهن دموع
كافي ما ظل ﮔـلب بضلوعي تجرحه
الـﮕـلب ذاب وطاح من وسط
الضلــوع
كافي ما أرجع بعد يا التيهتني وتيهيتك
وتاهت دروب الرجوع

نبذة عن الكاتب

مقالات ذات صله

الرد